اسباب حزن محمد صلاح من مصر

تخيل نفسك لاعب مصري مرشح لجائزة أحسن لاعب في العالم للمرة الثانية فى حياتك ..
تخيل إنك عملت لمصر كتير خاصة على المستوى الدعائي اللي هو أهم من المستوي الرياضي علي فكرة ..
وعملت خير كتير وعمرك مااذيت حد ..
طب تخيل بقي إن بلدك في ايدها 15 نقطة في التقييم كالتالي:
5 في ايد مدرب المنتخب لو رشحك اول
5 في ايد كابتن المنتخب لو رشحك اول
5 في ايد ممثل الإعلام في مصر (مراسل جريدة البوابة في برلين)

قادر تتخيل كل ده ...
طيب تعالي نشوف بقي ايه اللي حصل:

‏بعد التصويت لقيت نفسك في المركز الرابع ب 26 صوت
واللي في المركز التالت 36 صوت
اللي في المركز التاني 38 صوت
وأحسن لاعب اخد 46 صوت

يعني اللي بينك وبين انك تكون تالت احسن لاعب في العالم عشرة نقاط بس ... وتلاتاشر نقطة علشان تبقي تاني احسن لاعب في العالم ...

اكيد طبعا حتكون متأكد انك حصلت علي الخمستاشر نقطة اللي من اولاد بلدك ... موش كده ولا ايه ...!@
لكن لما اعلنوا الأصوات وجدت أن ال 15 نقطة اللي في ايد مصر اخد منهم نقطة واحدة فقط
آه والله ... تصدق
طبعا موش ممكن تصدق ...صح..!!
ال 10 بتوع المدرب والكابتن ما راحوش أساسا (وهم بيقولوا سلمناهم للاتحاد)
وبتوع الاعلامي اخدت نقطة واحدة بس .. لانه رشح صلاح تالت ..

طب عايز تتضايق كمان شوية ... خد دي ..

‏جمال بلماضي مدرب الجزائر اللي شتمناه (وكان يستاهل علي موقفه في حينه) اختار صلاح رقم 1 واخد 5 نقاط بسببه
وكابتن الجزائر اختاره رقم 3 واخد نقطة
يعني اخد من الجزائر 6 نقاط
ومن مصر نقطة واحدة
تحب اجيب لك جلطة بقي ...
خد دي ..

‏النقاط التى حصل عليها صلاح من العرب فى تصويت الفيفا

الامارات 8
الجزائر 6
عمان 5
الصومال 5
لبنان 4
موريتانيا 3
المغرب 3
السودان 3
اليمن 3
الكويت 3
البحرين 3
قطر 1
مصر (( 1 )) !!!!! 😲😲😲
تونس و السعودية وباقي الدول العربية 0 🙈

حد عايز يقول حاجة علي الولد الوحش اللي شال انه لاعب منتخب مصر من BIO بتاعه ...
قليل الادب انت يا صلاح... مابيطمرش فيك ..
مصر ... جميلة قوي والله طول ماهي بتدي الدنيا نفحاتها ..
لكن المشكلة موش في مصر ..
المشكلة في هذه الكائنات التي تعيش علي ارض مصر ..
ولا اعرف الي اي فصيلة من فصائل المملكة الحيوانية ينتمون ...
رحم الله العالم احمد زويل حينما قال
"الغرب ليسوا عباقرة ونحن لسنا أغبياء ، هم فقط يدعمون الفاشل حتى ينجح ، ونحن نحارب الناجح حتى يفشل" !!!